وانا عالفيس شفت صورة لاش وبيكاتشو وصاحبها بيسأل مين دول
قلتله ومين ينسى ايام لما كان التلفزيون مبيعرضش غيرهم
وبعدين وحشتني كلماتها قلت اجيبها اسمعها
فتحت اليوتيوب وجبت الاغنية وخلال قرايتي للكومنتات
لاحظت احد الردود بيتكلم عن المغني بضمير المؤنث
كل اللى كنت عارفه انه الصوت صوت مراهق
بس اكتشفت انها واحدة واسمها هو رشا رزق
بدأت أدور مين رشا رزق
واتفاجئت إنه كل الاغاني اللى كنت حافظها من الكرتون على سبيس تون
كانت لرشا رزق !
رشا رزق فنانة موهوبة وعندها القدرة انها تنتقل بصوتها من صوت طفل لصوت مراهق لصوت شخص كبير
معظم أعمالها للاطفال وده ينبع من حبها الشديد للاطفال
اغانيها كلها تتسم بالاحساس العالي وبالكلمات الهادفة
حتى إنه في احد الكومنتات على الاغنية
(العنوان كان بالانجليزي فمعظم الزوار كانوا اجانب)
قال إنه عجبه الاصدار العربي اكتر من الاجنبي
وحاسس إنها عايشة جوه الاغنية اكتر
رغم انه مفهمش كلمات الاغنية !
رغم انه العادي انه اي فنان يكون ليه محبيه وليه كارهيه
إلا إنه رشا رزق كانت تحصد المديح في كل مكان
ورغم انها افضل من كثيرين إلا انها لم تنال من الشهرة بقدرهم
لإنها تسعى فقط لاسعاد الاطفال لا لاسعاد نفسها
كام من الاطفال عدو عليها من غير ما يعرفوها
كم من تربوا على اغانيها التي لازالت كلماتها ترن في اذهاننا
ساعتها جاتلي فكرة إني اعمل مدونة تجمع كل اعمالها
وقررت إني أسمي المدونة باسمها
كل التحية لكي
رشا رزق
